កោះកុង៖ នៅព្រឹកថ្ងៃទី ១៣ ខែធ្នូ ឆ្នាំ ២០២៣ នេះ លោក ហាក់ ឡេង អភិ បាលរងខេត្តកោះកុង អញ្ជើញជាអធិបតី បើកវេទិកាកិច្ចសន្ទនាភាពជាដៃគូ រវាងរដ្ឋ បាលខេត្ត និងអង្គការសង្គមស៊ីវិល នៅសាលមហោស្រព ។
ថ្លែងក្នុងកិច្ចសន្ទនា លោក ហាក់ ឡេង អភិបាលរងខេត្ត បានលើកឡើងថា វេទិកាកិច្ចសន្ទនាភាពជាដៃគូ រវាងរដ្ឋបាលខេត្ត និងអង្គការសង្គមស៊ីវិល ធ្វើឡើង០២ដង ក្នុង១ឆ្នាំ ក្នុងគោលបំណងពង្រឹងកិច្ចសហ ការភាពជាដៃគូ រវាងដ្ឋបាលខេត្ត និងអង្គ ការ សមាគម និងសហគមន៍នានា ក្នុងដែនសមត្ថកិច្ច ដើម្បីរួមចំណែកជាមួយរាជរដ្ឋាភិបាលក្នុងការអភិវឌ្ឍខេត្តកោះកុង ឱ្យកាន់តែរីកចំរើន និងស្របទៅនឹងគោល ការណ៍ច្បាប់ ជាប្រទេសដែលមានលទ្ធិ ប្រជាធិបតេយ្យ និងនីតិរដ្ឋពេញ លេញ។ ក្រោមម្លប់សុខសន្តិភាព និងក្រោមដំបូលនៃលទ្ធិប្រជាធិបតេយ្យ ថ្ងៃនេះបានរៀបចំវេទិកាពិគ្រោះយោបល់ ជាមួយអង្គការ សមាគម និងសហគមន៍នានា ក្នុងខេត្តកោះកុង ក្រោមប្រធានបទ “ការពង្រឹងសហការភាពជាដៃគូ រវាងរដ្ឋបាលខេត្ត និងអង្គការ សមាគម និងសហគមន៍នានា នៅមូលដ្ឋានក្នុងដែនសមត្ថកិច្ចរដ្ឋបាលខេត្តកោះកុង” ។
លោក ហាក់ ឡេង អភិបាលរងខេត្ត ថ្លែងបន្ថែមថា រាជរដ្ឋាភិបាលថ្មី ដែលដឹកនាំដោយសម្ដេចបវរធិបតី ហ៊ុន ម៉ាណែត នាយករដ្ឋមន្ត្រី សម្រាប់នីតិកាលទី៧ នៃរដ្ឋសភា បានដាក់ចេញនូវយុទ្ធសាស្ត្រថ្មី គឺយុទ្ធសាស្រ្តបញ្ចកោណដំណាក់កាលទី១ ដើម្បីបន្តចីរភាពឱ្យសម្រេចនូវចក្ខុវិស័យឆ្នាំ២០៥០ ជាប្រទេសដែលមាន ចំណូលខ្ពស់ ដោយមានគន្លឹះអាទិភាពចំនួន ០៥ រួមមាន មនុស្ស ផ្លូវ ទឹក ភ្លើង និងបច្ចេក វិទ្យា។
លោកអភិបាលថ្លែងថា ដើម្បីសម្រេចបាននូវចក្ខុវិស័យនេះ គឺយើងពិតជាមិនអាចខ្វះបាន នូវការចូលរួមពីគ្រប់មជ្ឈដ្ឋាននានា ជាពិសេសភាពជាដៃគូអភិវឌ្ឍន៍ ជាមួយអង្គការសង្គមស៊ីវិល ដែលបានធ្វើសកម្មភាព រួមចំណែកស្ទើគ្រប់វិស័យ ដូចជាការកសាង ធនធានមនុស្ស តាម រយៈការបណ្តុះបណ្តាល និងឧបត្ថម្ភដល់សិស្ស និស្សិត នៃគ្រួសារក្រីក្រ រួមចំណែកលើវិស័យ កសិកម្ម ដោយផ្តល់នូវពូជធារ សត្វចិញ្ចឹម លើកកម្ពស់សុខមាលភាព ប្រជាពលរដ្ឋក្នុងមូលដ្ឋាន តាមសហគមន៍៕ ដោយ ញុឹប សន
