(ខេត្តឧត្តរមានជយ័)នាព្រឹកថ្ងៃទី១០ ខែតុលា ឆ្នាំ២០២៣ឯកឧត្តម បណ្ឌិត សួង ណយ អគ្គលេខាធិការរង គណៈកម្មាធិការជាតិជំរុញចលនាភូមិមួយផលិតផលមួយ នៃទីស្ដីការគណៈរដ្ឋមន្ដ្រី និងលោកជំទាវ មិន ធារី អភិបាលរងខេត្តឧត្តរមានជ័យ តំណាងដ៏ខ្ពង់ខ្ពស់របស់ឯកឧត្តម អភិបាលខេត្តឧត្តរមានជ័យ បានអញ្ជើញជាអធិបតីភាព ក្នុងវេទិកាផ្គូផ្គងរវាងអ្នកផលិត និងអ្នកទិញ និងការតាំងបង្ហាញផលិតផលក្នុងស្រុក ក្រោមគម្រោងការទទួលបានទីផ្សារសម្រាប់ អ្នកផលិតក្នុងស្រុក និងសហគ្រាសធុនមីក្រូតូច និងមធ្យម (ភូមិមួយផលិតផលមួយ)។ វេទិកានេះធ្វើឡើងនាថ្ងៃទី១០ ខែតុលា ឆ្នាំ២០២៣ ចាប់ពីម៉ោង ៨:០០ – ១៧:០០ នៅសាលប្រជុំខេត្តឧត្តរមានជ័យ និងតាំងលក់ផលិតផលនៅក្នុងសាលប្រជុំសាលាខេត្ត។
ពិធីនេះក៏មានការអញ្ជើញចូលរួមពីសំណាក់ ឯកឧត្តម លោកជំទាវប្រតិភូអមដំណើរ ក្រុមប្រឹក្សាភិបាលខេត្ត អភិបាលរងខេត្ត លោក លោកស្រី ប្រធាន អនុប្រធានមន្ទីរ អភិបាល អភិបាលរង ក្រុង ស្រុកអង្គភាព ស្ថាប័នពាក់ព័ន្ធនានាជុំវិញខេត្តផងដែរ អាជ្ញាធរមូលដ្ឋាន អាជីវករ សិប្បករ ឧស្សាហករ សហគមន៍ សមាគម ក្រុមផលិត។
លោកជំទាវ អភិបាលរងខេត្ត បានមានប្រសាសន៍ថា វេទិកាផ្គូផ្គងរវាងអ្នកផលិត និងអ្នកទិញ គឺបានចូលរួមចំណែកក្នុងការអនុវត្តយុទ្ធសាស្ត្រជាតិសម្រាប់កាត់បន្ថយភាពក្រីក្រ គឺការគៀងគរសក្តានុពលសេដ្ឋកិច្ចក្នុងស្រុកនៃផលិតផល និងសេវាកម្ម ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ និងសហគមន៍មូលដ្ឋាន។ ភ១.ផ១ ធ្វើការជាមួយអ្នកផលិតក្នុងស្រុក ធុនមីក្រូ តូច និង មធ្យម និងសមាគមធុរកិច្ច (MSMEs/SMEs, ACs) ប្រមាណ១៥០នាក់បានចូលរួម ដើម្បីបង្កើនគុណភាព និងទីផ្សារនៃផលិតផលក្នុងស្រុក។ យើងធ្វើការលើការកសាង បណ្តាញទីផ្សារ ដើម្បីអោយប្រទាក់ក្រឡាគ្នារវាងអ្នកផលិត និងអ្នកទិញយកទៅប្រើប្រាស់ កែច្នៃវេចខ្ចប់ ផលិតផលក្នុងស្រុក ដើម្បីលក់បន្ត និងឈានទៅការនាំចេញ។ លើសពីនេះ យើងទាក់ទងជាមួយអាជ្ញាធរ និង សា្ថប័នពាក់ព័ន្ធ ដើម្បីកសាងបរិយាកាសអំណោយផលសម្រាប់ផលិតផលក្នុងស្រុកឱ្យកាន់តែរីកចម្រើន នាំឱ្យមាន ការអភិវឌ្ឍសេដ្ឋកិច្ចប្រកបដោយនិរន្តរភាពក្នុងប្រទេស។
ឯកឧត្តមបណ្ឌិត សួង ណយ អគ្គលេខាធិការរង គណៈកម្មាធិការជាតិជុំរុញចលនាភូមិមួយផលិតផលមួយ នៃទីស្តីការគណៈរដ្ឋមន្ត្រី បានថ្លែងថា៖ «គណៈកម្មាធិការជាតិ និងគណៈកម្មាធិការខេត្ត–រាជធានី ជុំរុញចលនាភូមិមួយផលិតផលមួយ មានសេចក្តីរំភើបរីករាយ ចំពោះការដឹកនាំគំនិតផ្ដួចផ្ដើម ឱ្យមានជំនួបរវាងផលិតផល និងអ្នកទិញ ដ៏មានសារៈសំខាន់នេះ ដែលមានគោលបំណងកាត់បន្ថយគំលាតរវាងអ្នកផលិតក្នុងស្រុក និងអ្នកទិញ ប្រកបដោយប្រសិទ្ធភាព និងសុច្ចរិតភាព។
ឯកឧត្តមបណ្ឌិតបានបន្តថា : តាមរយៈការបង្កើតយន្តការតភ្ជាប់បណ្ដាញប្រទាក់ក្រឡាគ្នាប្រកបដោយអត្ថន័យ ពីអ្នកផ្គត់ផ្គង់វត្ថុធាតុដើម អ្នកកែច្នៃវេចខ្ចប់ អ្នកប្រមូលផ្ដុំផលិតផល (ពីកសិដ្ឋានរហូតដល់តុបាយ ពីសិប្បកររហូតដល់អ្នកប្រើប្រាស់) ហើយពួកគាត់អាចសិក្សាស្វែងយល់ដកស្រង់បទពិសោធន៍ពីគ្នាទៅវិញទៅមក។ ណែនាំអ្នកផលិតទៅកាន់ទីផ្សារ ដោះស្រាយបញ្ហាជាមួយស្ថាប័នពាក់ព័ន្ធ ក្នុងការចុះបញ្ជី ឬច្បាប់គតិយុត្តិផ្សេងៗ និងជំរុញឱកាសពាណិជ្ជកម្ម ឱ្យកាន់តែមានទំនុកចិត្ត និងរួមចំណែកដល់ការអភិវឌ្ឍន៍សេដ្ឋកិច្ចនៃខេត្តឧត្តរមានជយ័ និងប្រទេសកម្ពុជាទាំងមូល ដើម្បីបង្កើនកម្រិតជីវភាពរបស់សហគមន៍មូលដ្ឋានផងដែរ។
ជាចុងបញ្ចប់ នៃកម្មវិធីគណៈអធិបតីក៏បាន អញ្ជើញទស្សនានូវការតាំងផលិតផលនានា ដែលមានដូចជា សំលៀកបំពាក់ ក្រម៉ាសូត្រកាបូបខ្មែរ ចំណីអាហារកែច្នៃ ភេសជ្ជៈ ស្រាផ្លែឈើ ផលិតផលកសិកម្ម ចម្លាក់ សិល្បៈ និងរបស់ប្រើប្រាស់ផ្សេងៗប្រចាំថ្ងៃផងដែរ៕
វេទិកា និងការតាំងបង្ហាញផលិតផលនៅខេត្តឧត្តរមានជយ័នាឱកាសនេះ មានអ្នកចូលរួមដោយផ្ទាល់ប្រមាណ ១៥០នាក់ រួមមានថ្នាក់ដឹកនាំ និងតំណាងមកពីមន្ទីរពាក់ព័ន្ធ សមាគមធុរកិច្ច សហគ្រាសខ្នាតតូច និងមធ្យម សហគមន៍កសិកម្ម ស្ថាប័នហិរញ្ញវត្ថុ អង្គការសង្គមស៊ីវិល និងក្រុមយុវជន។ គម្រោងដ៏មានសារៈសំខាន់នេះ ត្រូវបានផ្តួចផ្តើមឡើងដោយ គណៈកម្មាធិការជាតិជំរុញចលនាភូមិមួយផលិតផលមួយ និងអង្គការអុកស្វាម តាំងពីឆ្នាំ២០២២។ នាឆ្នាំ២០២៣នេះ គណៈកម្មាធិការជាតិជំរុញចលនាភូមិមួយផលិតផលមួយ មានសេចក្តីសោមនស្សរីករាយយ៉ាងខ្លាំងដែលបានទទួលការឧបត្ថម្ភគាំទ្រគម្រោងនេះ អំពីដៃគូសហការថ្មី គឺសហគ្រិនខ្មែរ ដើម្បីជួយគាំទ្រ និងពង្រឹងលទ្ធភាពទទួលបានទីផ្សារសម្រាប់អ្នកផលិតក្នុងស្រុក និងពង្រីកការគាំទ្រនេះទៅកាន់បណ្តាខេត្ត-ក្រុងផ្សេងៗទៀត។ ឆ្នាំ2023នេះ គណៈកម្មាធិការជាតិជំរុញចលនាភូមិមួយផលិតផលមួយ មានគម្រោងរៀបចំវេទិកានេះនៅតាមបណ្តាខេត្ត-ក្រុង ចំនួន១៥ រួមមាន៖ សៀមរាប កំពង់ឆ្នាំង បាត់ដំបង បន្ទាយមានជ័យ កំពង់ចាម ឧត្តរមានជ័យ កណ្តាល កំពត កោះកុង ពោធិ៍សាត់ កំពង់ធំ ត្បូងឃ្មុំ ស្ទឹងត្រែង កំពង់ស្ពឺ និងស្វាយរៀង។ឈឹម.កុសល។
០