ទំព័រដើម ទំព័រដើម អាជ្ញាធរក្រុងព្រះសីហនុ បើកកិច្ចប្រជុំពិភាក្សាលើសេចក្តីព្រាងច្បាប់ ស្តីពីសណ្តាប់ធ្នាប់សាធារណៈ

អាជ្ញាធរក្រុងព្រះសីហនុ បើកកិច្ចប្រជុំពិភាក្សាលើសេចក្តីព្រាងច្បាប់ ស្តីពីសណ្តាប់ធ្នាប់សាធារណៈ

- ពាណិជ្ជកម្ម -

ព្រះសីហនុ៖ នៅព្រឹកថ្ងៃទី២ ខែ កក្កដាឆ្នាំ២០២០នេះ មានការបើកកិច្ចប្រជុំពិនិត្យ ពិភាក្សា និងរួមយោបល់លើសេចក្ដីព្រាងច្បាប់ ស្ដីពីសណ្ដាប់ធ្នាប់សាធារណៈ ក្រោមអធិបតីភាព លោក ម៉ាង ស៊ីណេត អភិបាលរងអភិបាលខេត្តព្រះសីហនុ និង ដោយមានការចូលរួមពីសមាជិកក្រុមប្រឹក្សា ខេត្ត នាយក រដ្ឋបាលសាលាខេត្ត ប្រធានមន្ទីរជុំវិញខេត្ត កងកម្លាំងទាំង៣ អភិបាលក្រុង ស្រុក ទីចាត់ការ និងអង្គភាពចំណុះសាលាខេត្ត និងមន្ត្រីពាក់ព័ន្ធ ស្ថាប័នតុលាការ និង មេធាវីតំណាងឱ្យក្រុមអ្នកច្បាប់។

សេចក្ដីព្រាងច្បាប់នេះ ត្រូវបានសិក្សា ស្រាវជ្រាវ និងចងក្រង ដោយគណៈកម្មការតាក់តែងសេចក្ដីព្រាងច្បាប់ ស្ដីពីសណ្ដាប់ធ្នាប់សាធារណៈ មាន ៨ជំពូក និង ៤៣មាត្រា មានគោលបំណងធានាការគ្រប់គ្រងសណ្ដាប់សាធារណៈ ឱ្យមានរបៀបរៀបរយសោភ័ណភាព អនាម័យ បរិស្ថាន ភាពស្ងប់ស្ងាត់ សុវត្ថិភាពសង្គម រក្សាប្រពៃណីជាតិ និងសេចក្ដីថ្លៃថ្នូររបស់ប្រជាពលរដ្ឋ។ ដើម្បីប្រមូលធាតុចូល និងតម្រូវការជាក់ស្ដែងពីអាជ្ញាធរ នៅមូលដ្ឋានថ្នាក់ក្រោមជាតិ គណៈកម្មការតាក់តែងសេចក្ដីព្រាងច្បាប់នេះ បានស្នើសុំរដ្ឋបាលខេត្ត ពិនិត្យ ពិភាក្សា និងរួមយោបល់លើសេចក្ដីព្រាងច្បាប់នេះ ដើម្បីកែសម្រួលចុងក្រោយដាក់ជូនរាជរដ្ឋាភិបាល។

ក្នុងកិច្ចប្រជុំ ដោយមានការសំណូមពរ និងជម្រុញឱ្យមានការពិភាក្សា និងផ្ដល់យោបល់ ពីលោក ម៉ាង ស៊ីណេតប្រធានអង្គប្រជុំ អង្គប្រជុំបានពិភាក្សា ផ្ដល់យោបល់ និងចែករំលែកយ៉ាងផុលផុស ដើម្បីបានជាធាតុចូលដាក់ជូនគណៈកម្មការ តាក់តែងសេចក្ដីព្រាងច្បាប់ពិនិត្យ និងសម្រេច។ បន្ថែមពីនោះ បន្ទាប់ពីការពិនិត្យ និង ចូលរួមយោបល់លើសេចក្ដីព្រាងច្បាប់ ស្ដីពីសណ្ដាប់ធ្នាប់សាធារណៈរួចមក លោក ម៉ាង ស៊ីណេត អភិបាលរងខេត្ត បានមានប្រសាសន៍ក្រើនរំលឹកដល់អាជ្ញាធរក្រុង ស្រុក និងមន្ទីរអង្គភាព សូមបន្តអប់រំផ្សព្វផ្សាយ អំពីវិធានការការពារជម្ងឺឆ្ងងកូវីដ១៩ ស្របតាមគោលការណ៍ណែនាំ របស់ក្រសួងសុខាភិបាល សូមកុំមានធ្វេសប្រហែសឱ្យសោះ៕ រូបភាព និងអត្ថបទ៖ អួនប្រុស

- ពាណិជ្ជកម្ម -
ទទួលផ្សាយពាណិជ្ជកម្ម