កោះកុង៖ ក្រោយពីរដូវជំនន់ទឹកភ្លៀង បានកន្លងផុតទៅ ផ្លូវភ្លោះបេតុងមួយខ្សែ ដែលទទួលរងការខូចខាត បែកបាក់ទ្រង់ ទ្រាយជាសំបុកមាន់ ត្រូវបានចុះជួសជុលស្ថាបនាឡើងវិញ ដោយមន្ទីរសាធារណការ និងដឹកជញ្ជូនខេត្តកោះកុង។
លោក អន ដាវុធ ប្រធានមន្ទីរសាធារណការ និងដឹកជញ្ជូនខេត្តកោះកុង បានប្រាប់ឲ្យដឹងថា នៅក្នុងរដូវ វស្សាជោកជាំ ដោយទឹកជំនន់មួយរយៈកន្លងមក បានធ្វើឲ្យផ្លូវ នៅក្នុងខេត្តមួយចំនួនទទួលរងការខូចខាត យ៉ាងដំណំហើយបច្ចុប្បន្ននេះ មន្ទីរសាធារណៈការ និងដឹកជញ្ជូនខេត្តបានយកចិត្តទុកដាក់ ចុះជួសជុលស្ថាប នាឡើងវិញ ដើម្បីទុកជូនពលរដ្ឋ និងភ្ញៀវទេសចរ ដែលបានធ្វើដំណើរកំសាន្តមក ដល់ខេត្តកោះកុងយើងនេះ និងទាំងការដឹកជញ្ជូនទំនិញផ្សេងៗ ដើម្បីឱ្យងាយ ស្រួលក្នុងការធ្វើចរាចរណ៍ផងដែរ។
លោក អន ដាវុធ ប្រធានមន្ទីរសាធារណ: ការ បានមានប្រសាសន៍បន្តទៀតថា ផ្លូវដែលកំពុងទទួលការជួសជុលឡើងវិញនេះ គឺមានចម្ងាយជាង ៧ គីឡូម៉ែត្រ ចាប់ពីគល់ស្ពានកោះកុង រហូតទៅដល់ច្រកចាំយាម ព្រំប្រទល់កម្ពុជា-ថៃ ហើយការជួសជុលឡើងវិញនេះ គឺធ្វើឡើងដោយការចាក់បេតុង ដែលមានទទឹង ៥ម៉ែត្រ កម្រាស់២តឹក ដើម្បីជួយទុបនិងទ្រទ្រង់ទម្ងន់ ធុនធ្ងន់កុំឲ្យមានការ បាក់ប្រេះស្រាំតទៅទៀត។ ហើយការជួសជុលស្ថាបនាផ្លូវភ្លោះនេះទៀត គឺជាគម្រោង ដំណាក់កាលទី៣ ដែលត្រូវបញ្ចប់ ដែលជាថវិការជាតិ។
លោក អន ដាវុធ ក៏បានមានប្រសាសន៍ផ្ដាំផ្ញើរផងដែរថា ក្រោយពីទទួលបាន ការជួសជុលសាងសង់ផ្លូវនេះឡើងវិញរួច ហើយ សូមឲ្យក្រុមហ៊ុនដឹកជញ្ជូនទំនិញផ្សេងៗ ក៏ដូចជាពលរដ្ឋក្នុងខេត្តទូទៅ សូមចូលរួម ថែរក្សាការពារផ្លូវ ឲ្យបានយូរអង្វែង ដើម្បីកុំឲ្យចំណាយថវិកា របស់រដ្ឋដែលធ្វើឱ្យមានការខូចខាតដល់ផល ប្រយោជន៍ជាតិផងដែរ៕ រូបភាព និងអត្ថបទ៖ សុគន្ធី
