កណ្ដាល៖ សេចក្តីរាយការណ៍មួយបានឲ្យដឹងថា កាល ពីម៉ោង៥នឹង៣០នាទី ល្ងាចថ្ងៃទី១៤ ខែមេសា ឆ្នាំ២០២១ សមត្ថកិច្ចស្រុកកណ្តាលស្ទឹង ខេត្តកណ្តាល បានឃាត់ខ្លួនបុរសម្នាក់ ពាក់ព័ន្ធករណី គ្រងឯកសណ្ឋានក្លែងធ្វើជាមន្ត្រីនគរបាលជាតិ ដែលជាល្បិចងាយស្រួលក្នុងការឆ្លងកាត់គោលដៅត្រួតពិនិត្យរបស់សមត្ថកិច្ចក្នុងការអនុវត្តនូវវិធានបំរាមគោចរ ។
អ្នកក្លែងបន្លំនោះមានឈ្មោះ រ៉េត បញ្ញា អាយុ ២៦ឆ្នាំ មុខរបរ មិនពិត ប្រាកដ មានទីលំនៅភូមិ ក្រាំងធ្មៃ ឃុំគោកត្រប់ ស្រុកកណ្តាលស្ទឹង ខេត្តកណ្តាល។
ប្រភពព័ត៌មានដដែលបានឲ្យដឹងទៀតថានៅវេលាម៉ោងខាងលើ បុរសរូបនោះ បានធ្វើដំណើរដោយជិះម៉ូតូ១គ្រឿង ក្នុងសម្លៀកបំពាក់ឯកសណ្ឋានជានគរបាលជាតិ ចេញពីផ្ទះរបស់ខ្លួន ដើម្បីទៅផ្ទះរបស់ឈ្មោះ ម៉ៅ ស្ថិតនៅភូមិ ព្រែកអង្គុញ ឃុំសៀមរាប ស្រុកកណ្តាលស្ទឹង ។ លុះជិះទៅជិតផ្ទះរបស់ម៉ៅ ជនខាងលើបានឆ្លងកាត់គោលដៅរបស់ប្រជាការពារ ដែលកន្លែងត្រួតពិនិត្យដើម្បីបង្ការការរីករាលដាល និងប្រយុទ្ធប្រឆាំងជំងឺកូវីដ-១៩ របស់ភូមិព្រែកអង្គុញ ពេលនោះក៏ត្រូវកម្លាំងប្រជាការពារឃាត់ធ្វើការសួរនាំ ។
ដោយមានការសង្ស័យកម្លាំងប្រជាការពារ បានទូរស័ព្ទរាយការណ៍ទៅនគរបាលប៉ុស្តិ៍រដ្ឋបាលឃុំសៀមរាប ដើម្បីឲ្យដឹងពីសកម្មភាព និងទង្វើដែលជននេះបានប្រព្រឹត្តមកលើកម្លាំងកំពុងអនុវត្តនូវផែនការការពារ និង រាំងខ្ទប់ផលប៉ះពាល់ជំងឺរាតត្បាតវីរុសកូវី-១៩ ។
ខណៈនោះកម្លាំងប៉ុស្តិ៍នគរបាលរដ្ឋបាលឃុំសៀម រាបបានចុះទៅដល់ និងបានឃាត់ខ្លួនបុរសនេះយកទៅសាកសួរនៅនគរបាលប៉ុស្តិ៍ ទើបដឹងថាជាជនក្លែងបន្លំគ្រងឯកសណ្ឋាន ជាមន្ត្រីនគរបាលជាតិ ដើម្បីងាយស្រួលក្នុងការឆ្លងកាត់ និងបំលាស់ទីពីភូមិមួយទៅភូមិមួយ ពីកន្លែងមួយទៅកន្លែងមួយ ក្នុងការប្រាស្រ័យទាក់ទងជាមួយមិត្តភ័ក្ត ក្នុងអំពើដែលខុសនឹងច្បាប់ហាមឃាត់ ។
ជាក់ស្តែងក្រៅពីគ្រងឯកសណ្ឋានសម្លៀកបំពាក់ក្លែងជាមន្ត្រីនគរបាលជាតិ ជននេះត្រូវបានសមត្ថកិច្ចរកឃើញមានផ្ទុកនូវសារធាតុញៀនក្នុងខ្លួន ពោលគឺប្រើប្រាស់គ្រឿងញៀនទៀតផង។
បច្ចុប្បន្នបុរសរូបនេះ និងវត្ថុតាងត្រូវបាននគរបាលប៉ុស្តិ៍សៀមរាប នាំខ្លួនទៅកាន់អធិការដ្ឋាននគរបាលស្រុកកណ្តាលស្ទឹងដេីម្បីបន្តនីតិវិធី ៕អត្ថបទនិងរូបភាព ឆាយ តារា