ប៉ៃលិន៖ ដើម្បីចូលរួមចំណែក ក្នុងការអនាម័យបរិស្ថានជាតិ២៣វិច្ឆិកា ២០២០ និងបំផុសស្មារតីប្រជាពលរដ្ឋទាំងអស់ ក្នុងខេត្តប៉ៃលិន ឱ្យមានការយល់ដឹងកាន់តែច្បាស់អំពីបញ្ហាសោភ័ណភាព សុខភាពរាងកាយ និងសុខភាពផ្លូវដង្ហើម កាលពីព្រឹកថ្ងៃទី២៥ ខែវិច្ឆិកា ឆ្នាំ២០២០នេះ ក្រុមការងារយុវជន ស.ស.យ.ក ខេត្តប៉ៃលិន បានសហការជាមួយនឹងរដ្ឋបាលខេត្ត រៀបចំកម្មវិធីអនាម័យបរិស្ថានជាតិ២៣វិច្ឆិកា ក្រោមប្រធានបទ «អនាម័យបរិស្ថានល្អ សុខភាពសហគមន៍ល្អ» ដែលបានប្រព្រឹត្តទៅនៅ មុខបរិវេណសាលាខេត្តប៉ៃលិន ក្រោមអធិតីភាពឯកឧត្តម ផាន់ ចាន់ធុល អភិបាលខេត្ត និងមានការចូលរួមពីសិស្សានុសិស្ស លោកគ្រូអ្នកគ្រូ មន្រ្តីរាជការ ព្រមទាំងប្រជាពលរដ្ឋយ៉ាងច្រើនកុះករផងដែរ។
នៅក្នុងកម្មវិធីអបអរសាទរ ទិវាអនាម័យបរិស្ថានជាតិ២៣វិច្ឆិកា សម្រាប់ឆ្នាំ២០២០នេះ ក្រុមការងារយុវជន ស.ស.យ.ក ខេត្តប៉ៃលិន បានសហការជាមួយនឹងរដ្ឋបាលខេត្ត រៀបចំកម្មវិធីបោសសម្អាត ដោយអ្នកខ្លះមានអំបោស បង្គី ធុងសម្រាម ដើររើសសំរាមនៅតាមដងផ្លូវនានា ក្នុងក្រុងប៉ៃលិន ក្នុងគោលបំណងបំផុស និងជម្រុញស្មារតីប្រជាពលរដ្ឋ ឲ្យមានការយល់ដឹងកាន់តែច្បាស់ ពីផលប៉ះពាល់នៃសំរាម ដែលគេបោះចោល ពាសវាលពាសកាល។ ការបំផុសស្មារតីនេះ វាបានពញ្ញាក់ អារម្មណ៍ពលរដ្ឋ ឱ្យយកចិត្តទុកដាក់ រក្សាសំរាមទុកមួយកន្លែងឱ្យបានល្អ រួចកើបយកទៅចាក់ចោល នៅទីលានចាក់សំរាម ឬដុតចោលតែម្តង។
កន្លែងណាមានសម្រាមច្រើន គឺទីនោះនឹងអាចធ្វើឱ្យបាត់បង់ សោភ័ណភាពទីក្រុង និងបង្កផលប៉ះពាល់ដល់សុខភាព ក្លាយទៅជាកើតជម្ងឺរោគាផ្សេងៗ ដល់មនុស្សក្មេងចាស់ បុ្រសស្រី ជាពិសេសគឺកុមារតូចៗ បណ្តាលឱ្យរលាកផ្លូវដង្ហើម និងរលាកសួតជាដើម។
ក្នុងកម្មវិធីនេះ មានពាក្យស្លោកលើកទឹកចិត្ត ធ្វើឱ្យចាប់អារម្មណ៍ និងគួរយកមកអនុវត្តតាមដូចជា « អនាម័យល្អ បរិស្ថានស្អាត នាំមកនូវសុខភាព , បរិស្ថានផ្តើមចេញពីយើងទាំងអស់គ្នា, រួមគ្នា ដើម្បីលុបបំបាត់ការបំពុលប្លាស្ទីក, ផែនដីយើង ផ្ទះយើង ទីជម្រកយើង , បើស្រលាញ់បរិស្ថាន ស្រលាញ់សុខភាព សន្យាថានឹងមិនចោលសម្រាមផ្តេសផ្តាស, របស់បោះចោល គឺជាសំណល់ កែច្នៃឡើងវិញ គឺជាធនធាន, សំណល់សំរាម ជាប្រភពនៃមេរោគ »។
ក្រោយមកក្រុមការងារទាំងអស់ នាំគ្នាសម្អាតអនាម័យ នៅតាមសួនកុមារមុខសាលាខេត្ត និងនៅតាមដងផ្លូវ ដើម្បីបង្ហាញឱ្យឃើញពីគំរូល្អ ដល់ប្រជាពលរដ្ឋរស់នៅក្បែរៗនោះ និងប្រជាពលរដ្ឋ ដែលធ្វើដំណើរ តាមផ្លូវផងដែរ៕ រូបភាព និងអត្ថបទ៖ ភ្នំខៀវ
