បន្ទាយមានជ័យ៖ នគរបាលក្រុងប៉ោយប៉ែតឃាត់ខ្លួនជនសង្ស័យជួញដូរគ្រឿងញៀនរួមថ្នាំញៀនជាច្រើនកញ្ចប់ បញ្ជូនទៅកាន់ស្នងការដ្ឋាននគរបាលខេត្តបន្ទាយមានជ័យចាត់វិធានការបន្តនៅថ្ងៃទី២៩ ខែសីហា ឆ្នាំ២០២៣។
លោកវរសេនីយ៍ឯក សៅ សារឿន អធិការដ្ឋាននគរបាលក្រុងប៉ោយប៉ែត បានប្រាប់ថា៖ ជនសង្ស័យម្នាក់ ឈ្មោះ ណូត បារាំង ភេទប្រុស អាយុ៣៥ឆ្នាំ ជនជាតិ ខ្មែរ ទីលំនៅមិនពិតប្រាកដ។
លោកអធិការបញ្ជាក់ថា៖ នៅវេលាម៉ោង១៤ និង៣៥នាទី ថ្ងៃទី២៨ ខែសីហា ឆ្នាំ២០២៣ នៅពេលដែលកម្លាំងសមត្ថកិច្ចចុះល្បាតការពារសន្តិសុខសណ្នាប់ជូនប្រជាពលរដ្ឋ នៅតាមមូលដ្ឋាន ដល់ភូមិសាស្រ្តដល់ចំណុចម្តុំកាស៊ីណូ(ទីហាវ)ដែលស្ថិតនៅភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ភ្លាមៗនោះកម្លាំងនគរបាលបានជួបមុខសញ្ញាជនសង្ស័យខាងលើរួចសុំធ្វើការត្រួតពិនិត្យរកឃើញសម្ភារះនិងវត្ថុតាង រួមមាន៖១.ម្សៅក្រាម ស ថ្លាសង្ស័យជាសារធាតុញៀនចំនួន៣៣កូនថង់ ២.ថ្នាំគ្រាប់ពណ៌ក្រហមមានអក្សរ(WY)សង្ស័យជាសារធាតុញៀនចំនួន២៣៥គ្រាប់ ៣.ទូរស័ព្ទដៃ ចុចពិល ០១គ្រឿង ៤.កាបូបដៃខ្មៅមួយ ៥.បំពង់សំរាប់ចូកគ្រឿងញៀនមួយ។
ក្រោយពីឃាត់ខ្លួនយកមកសួរនាំនៅអធិការដ្ឋាននគរបាលក្រុងប៉ោយប៉ែត បានបន្តធ្វើតេស្តទឹកនោមស្វែងរកសារធាតុញៀនលទ្ធផលវិជ្ជមាន(+) ជំនាញសុំធ្វើការឃាត់ខ្លួនជនសង្ស័យដើម្បីកសាងសំណុំរឿងបញ្ជូនតាមនិតិវីធីច្បាប់៕(សៅ នៅ)
