បន្ទាយមានជ័យ៖ ជាងធ្វើឡានម្នាក់ ត្រូវចរន្តអគ្គីសនីឆក់រងរបួសធ្ងន់ ក្រោយពីបញ្ជូនទៅមន្ទីរពេទ្យសង្គ្រោះបន្ទាន់ បានស្លាប់បាត់បង់ជីវិត។ ហេតុការណ៍នេះបានកើតឡើង នៅវេលាម៉ោង៨និង៣០នាទីព្រឹកថ្ងៃទី២០ខែកញ្ញា ឆ្នាំ២០២០ នៅភូមិផ្លូវសៀម ឃុំគយមែង ស្រុកមង្គលបូរី ខេត្តបន្ទាយមានជ័យ។
លោកវរសេនីយ៍ឯក ស៊ិន ណារ៉ាក់ អធិការនគរបាលស្រុកមង្គលបូរី បានឲ្យដឹងថា ជនរងគ្រោះត្រូវខ្សែភ្លើងឆក់ស្លាប់មានឈ្មោះ នាង ណយ ភេទប្រុសអាយុ ៣០ ឆ្នាំនៅភូមិស្ទឹងចាស់ ឃុំគយម៉ែង ស្រុកមង្គល បូរី ខេត្តបន្ទាយមានជ័យ ជាជាងធ្វើឡាន។ លោកអធិការបានបញ្ជាក់ថា មុនពេលកើតហេតុជនរងគ្រោះ បានមកស៊ីឈ្នួលធ្វើឡានឲ្យឈ្មោះ ជៀង តឿន ភេទប្រុសអាយុ ៤១ឆ្នាំ នៅភូមិផ្លូវសៀម ឃុំគយមែង ស្រុកមង្គលបូរី នៅពេលធ្វើឡាន និងផ្សារដែកឡានរួច ជនរងគ្រោះ ក៏បានដើរទៅដកព្រីភ្លើង ត្រូវឆ្លងចរន្តអគ្គីសនីឆក់ជនរងគ្រោះ បណ្តាលឲ្យដួលរបួសធ្ងន់ ត្រូវបានដឹកទៅសង្រ្គោះភ្លាមៗ តែជាអកុសល ពេលដឹកដល់មន្ទីរពេទ្យ ជនរងគ្រោះបានស្លាប់បាត់បង់ជីវិតទៅហើយ។ សពជនរងគ្រោះ ត្រូវបានប្រគល់ជូនក្រុមគ្រួសារ ចាត់ចែងធ្វើបុណ្យតាមប្រពៃណី៕ រូបភាព និងអត្ថបទ៖ សន សុង
