ភ្នំពេញ: មនុស្សប្រុសស្រីមួយក្រុម បើករថយន្ត lexus rx- 450h មួយគ្រឿងរេចង្កូតឡើងលើឃឿនផ្លូវជ្រុលទៅបុកបង្គោលភ្លើងបំភ្លឺផ្លូវមួយដើមបណ្ដាលឲ្យទ្រេត ឯរថយន្តរងការខូចខាតយ៉ាងដំណំ។
ហេតុការណ៍នេះកើតឡើងកាលពីវេលាម៉ោង ១០និង ៤០ នាទីយប់ថ្ងៃទី ១៨ខែមិថុនា ឆ្នាំ២០២២ នៅក្នុងបរិវេណបឹងកក់ តាមបណ្តោយផ្លូវR6 ស្ថិតក្នុងសង្កាត់ស្រះចកខណ្ឌដូនពេញ រាជធានីភ្នំពេញ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុឃើញមានមនុស្សប្រុសស្រីប្រមាណជា៤នាក់បើករថយន្តលlexus rx450h មួយគ្រឿងពណ៌ស្គាល់ពាក់ស្លាកលេខភ្នំពេញ2AV-0611ធ្វើដំណើរទិសដៅពីជើងទៅត្បូងលុះមកដល់ចំណុចកើតហេតុខាងលើបានរេចង្កូតខាងស្ដាំដៃឡើងលើឃឿនចិញ្ចើមផ្លូវ ជ្រុលទៅបុកបង្គោលភ្លើងបំភ្លឺផ្លូវមួយដើមបណ្ដាលឲ្យទ្រេត ចំណែករថយន្តរងការខូចខាតផ្នែកខាងមុខខាងស្តាំយ៉ាងដំណំ។
ក្រោយកើតហេតុសមត្ថកិច្ចមូលដ្ឋាននិងសន្តិសុខក្រុមហ៊ុនបានចុះមកដល់កន្លែងកើតហេតុ ដោយសមត្ថកិច្ចបានឲ្យភាគីខាងរថយន្តធ្វើការសម្រុះសម្រួលគ្នាជាមួយខាងក្រុមហ៊ុនដើម្បីបញ្ចប់រឿងនៅនឹងកន្លែងកើតហេតុ៕ដោយ កុសល់
