កណ្តាល៖ បុរសម្នាក់ ត្រូវបានកម្លាំងប៉ុស្តិ៍នគរបាលរដ្ឋបាលកំពង់ភ្នំ និងកម្លាំងប៉ុស្តិ៍នគរបាលរដ្ឋបាលព្រែកទន្លាប់ និងកម្លាំងជំនាញគ្រឿងញៀន ស្រាវជ្រាវចាប់ខ្លួន បន្ទាប់ពីលួចថតស្រីៗងូតទឹក ហើយគម្រាមចែកចាយរូបភាពជាសាធារណៈ បើមិនឱ្យរួមរក្ស តែជនរងគ្រោះមិនព្រមក៏ប្តឹងទៅសមត្ថកិច្ច។
យោងតាមរបាយការណ៍របស់សមត្ថកិច្ច បានឱ្យដឹងថា ជនសង្ស័យមានឈ្មោះ កុសល្យ វាស្នា (វាសនា) ភេទប្រុស អាយុ២៦ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅ ភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្តាល ត្រូវបានចាប់ខ្លួននៅថ្ងៃទី២៨ ខែសីហា ឆ្នាំ២០២១ នៅត្រង់ចំណុចស្ពានដែក ឃុំព្រែកទន្លាប់ ស្រុកលើកដែក ខេត្តកណ្តាល ដោយយោងតាមដីកាបង្គាប់ឱ្យចាប់ខ្លួនចំនួន ២ផ្សេងគ្នា។
សូមបញ្ជាក់ថា ជនសង្ស័យឈ្មោះ កុសល្យ វាស្នា ក្រៅពីប្រព្រឹត្តអំពើមិនគប្បីនៅក្នុងសង្គម ក៏ជាមុខសញ្ញាមេខ្លោងជួញដូរគ្រឿងញៀន និងមានកាន់កាំភ្លេីងខុសច្បាប់ ដែលតែងតែបង្កភាពភ័យខ្លាចដល់អ្នកភូមិនៅពេលយប់ ដោយជននេះតែងតែលួចទៅមេីលស្រ្តីៗក្នុងភូមិងូតទឹក និងប្រេីទូរស័ព្ទលួចថតផងដែរ។ លេីសពីនេះជនសង្ស័យថែមទាំងគម្រាមដល់ស្រ្តីរងគ្រោះមួយចំនួនដោយនិយាយថា បេីមិនព្រមឱ្យរំលោភទេជនសង្ស័យរូបនេះ នឹងធ្វើការចែកចាយរូបភាពដែលខ្លួនលួចថតបានជាទីសាធារណៈ។
ជនសង្ស័យរូបនេះ កន្លងមកធ្លាប់ជាប់ពន្ធនាគារម្តងរួចមកហេីយ(ជួញដូរគ្រឿងញៀន) ប៉ុន្តែពេលដែលចេញពីពន្ធនាគារវិញមិនព្រមកែខ្លួន ថែមទាំងមិនខ្លាចសមត្ថកិច្ចលើសដេីម។ បច្ចុប្បន្ន ជនជាប់ចោទត្រូវបានសមត្ថកិច្ចជំនាញ បញ្ជូនទៅដាក់ពន្ធនាគារខេត្តកណ្តាលតាមនីតិវិធី៕ឆាយ តារា